Jab tum mere ghar aayi,
Tumne mera daaman
Kushiyon se bhar diya
Issliye tumhara naam
Maine Sneha rakh diya
Mere masoom se dil ne samjha
Tumhara naam Sneha rakh dene se
Mere niras zindagi mein
Pyaar ki bauchar ho jaayegi
Aaj jab peeche mudkar dekh rahi hoon
Toh kitna sach hai yeh
Tum bin meri zindagi
Kitni aadoori hoti
Tum hansti thi, toh main hans deti thi
Tum roti thi, toh main bhi ro deti thi
Tumne mujhse kabhi kuch bhi nahi maanga
Par tumhare mann ko padhne ki paribhasha
Ka mazaa hi kuch aur tha..
Tumhari choti choti khushiyon ko pura karne mein
Main duniya ek kar deti thi
Aur shayad hamesha karoongi..
Ghar par jab hum akele hote the
Beparwah filmi gaano par naachtey
Darwaze peh tak tak suntey he
Gaane bandh kar detey, bheegi billi ban jaatey
Kabhi kabhi lagta hai
Bachpan toh sach mein maine apna
Tumhare sangh he jiya hai
Dheere dheere hum dono saath bade hone lage
Tum meri beti aur main tumhare maa ke roop mein
Kahin bar tumhare hith main khade rehne mein
Tumhari yeh maa nakaamyaab rahi
Par tab tum mujhse zat se lipat jaati
Aur mujhe ehsaas dilati ki sab teek hai
Waqt ke saath kabhi kabhi lagta hai
Tum mujhse zyada badi ho gayi
Jab thaam ke mera haath tumne kaha
"Maa ab bas bhi karo
Tumhe pata hai, tum ek behtar insaan ho"
Tum har bar mera sar
Garv seh ooncha kar deti ho
Devi maa ki tarah
Tum meri jholi pyaar se bhar deti ho
Kabhi beti, kabhi saheli bankar
Kabhi pyaar, kabhi dukh baant leti ho
Maa beti ka yeh rishta bada lajawab hai
Isme khataas hai, mithaas hai
Poore chhappan bhog ka ehsaas hai!
Mujhe pata hai ki yeh woh pyaar ka bandhan hai
Jo waqt ke saath bas gehra hota chala jayega
Mujhe pata hai zindagi ke chaltey
Jab main ise dobara padungi
Tab isme aur bhi meetha ras bhar jayega
This poem is a reflection of my journey with my first daughter.
It began with a name that meant love and unfolded into an unconditional bond of love that deepened with every passing season.
Through playful memories, silent understandings, and the gentle reversal of roles, I’ve come to see that our relationship is not just one of mother and child - it’s a soul connection.
A celebration of the sweetness, the tang, and the fullness of a love that continues to ripen with time.
Written in Hindi—my emotional language—yet expressed in English script, this poem carries the rhythm of my heart and the voice of my roots.
Add comment
Comments